Itthīnaṁ ñāṇavippayuttānaṁ upapajjantīnaṁ tāsaṁ itthindriyaṁ uppajjati, no ca tāsaṁ paññindriyaṁ uppajjati. Itthīnaṁ ñāṇasampayuttānaṁ upapajjantīnaṁ tāsaṁ itthindriyañca uppajjati paññindriyañca uppajjati. Yassa vā pana paññindriyaṁ uppajjati tassa itthindriyaṁ uppajjatīti? Ñāṇasampayuttānaṁ na itthīnaṁ upapajjantānaṁ tesaṁ paññindriyaṁ uppajjati, no ca tesaṁ itthindriyaṁ uppajjati. Ñāṇasampayuttānaṁ itthīnaṁ upapajjantīnaṁ tāsaṁ paññindriyañca uppajjati itthindriyañca uppajjati. Yassa itthindriyaṁ uppajjati tassa manindriyaṁ uppajjatīti? Āmantā. Yassa vā pana manindriyaṁ uppajjati tassa itthindriyaṁ uppajjatīti? Sacittakānaṁ na itthīnaṁ upapajjantānaṁ tesaṁ manindriyaṁ uppajjati, no ca tesaṁ itthindriyaṁ uppajjati. Itthīnaṁ upapajjantīnaṁ tāsaṁ manindriyañca uppajjati itthindriyañca uppajjati. (Itthindriyamūlakaṁ.) Yassa purisindriyaṁ uppajjati tassa jīvitindriyaṁ uppajjatīti? Āmantā. Yassa vā pana jīvitindriyaṁ uppajjati tassa purisindriyaṁ uppajjatīti? Na purisānaṁ upapajjantānaṁ tesaṁ jīvitindriyaṁ uppajjati, no ca tesaṁ purisindriyaṁ uppajjati. Purisānaṁ upapajjantānaṁ tesaṁ jīvitindriyañca uppajjati purisindriyañca uppajjati. Yassa purisindriyaṁ uppajjati tassa somanassindriyaṁ uppajjatīti?