Sabbesaṁ cittassa bhaṅgakkhaṇe akusalavippayuttacittassa uppādakkhaṇe asaññasattānaṁ tesaṁ tattha abyākatā dhammā uppajjissanti, no ca tesaṁ tattha akusalā dhammā uppajjanti. Akusalānaṁ uppādakkhaṇe tesaṁ tattha abyākatā ca dhammā uppajjissanti akusalā ca dhammā uppajjanti. 9.2.1.5.4. Paccanīkapuggala Yassa kusalā dhammā na uppajjanti tassa akusalā dhammā na uppajjissantīti? Sabbesaṁ cittassa bhaṅgakkhaṇe kusalavippayuttacittassa uppādakkhaṇe nirodhasamāpannānaṁ asaññasattānaṁ tesaṁ kusalā dhammā na uppajjanti, no ca tesaṁ akusalā dhammā na uppajjissanti. Aggamaggassa bhaṅgakkhaṇe arahantānaṁ yassa cittassa anantarā aggamaggaṁ paṭilabhissanti tassa cittassa bhaṅgakkhaṇe tesaṁ kusalā ca dhammā na uppajjanti akusalā ca dhammā na uppajjissanti. Yassa vā pana akusalā dhammā na uppajjissanti tassa kusalā dhammā na uppajjantīti? Aggamaggassa uppādakkhaṇe yassa cittassa anantarā aggamaggaṁ paṭilabhissanti tassa cittassa uppādakkhaṇe tesaṁ akusalā dhammā na uppajjissanti, no ca tesaṁ kusalā dhammā na uppajjanti. Aggamaggassa bhaṅgakkhaṇe arahantānaṁ yassa cittassa anantarā aggamaggaṁ paṭilabhissanti tassa cittassa bhaṅgakkhaṇe tesaṁ akusalā ca dhammā na uppajjissanti kusalā ca dhammā na uppajjanti. Yassa kusalā dhammā na uppajjanti tassa abyākatā dhammā na uppajjissantīti?