Yassa vā pana purisindriyaṁ na uppajjissati tassa cakkhundriyaṁ na uppajjissatīti? Ye rūpāvacaraṁ upapajjitvā parinibbāyissanti yā ca itthiyo eteneva bhāvena katici bhave dassetvā parinibbāyissanti tesaṁ purisindriyaṁ na uppajjissati, no ca tesaṁ cakkhundriyaṁ na uppajjissati. Pacchimabhavikānaṁ ye ca arūpaṁ upapajjitvā parinibbāyissanti tesaṁ purisindriyañca na uppajjissati cakkhundriyañca na uppajjissati. Yassa cakkhundriyaṁ na uppajjissati tassa jīvitindriyaṁ na uppajjissatīti? Ye arūpaṁ upapajjitvā parinibbāyissanti tesaṁ cakkhundriyaṁ na uppajjissati, no ca tesaṁ jīvitindriyaṁ na uppajjissati. Pacchimabhavikānaṁ tesaṁ cakkhundriyañca na uppajjissati jīvitindriyañca na uppajjissati. Yassa vā pana jīvitindriyaṁ na uppajjissati tassa cakkhundriyaṁ na uppajjissatīti? Āmantā. Yassa cakkhundriyaṁ na uppajjissati tassa somanassindriyaṁ na uppajjissatīti? Āmantā. Yassa vā pana somanassindriyaṁ na uppajjissati tassa cakkhundriyaṁ na uppajjissatīti? Ye sacakkhukā upekkhāya upapajjitvā parinibbāyissanti tesaṁ somanassindriyaṁ na uppajjissati, no ca tesaṁ cakkhundriyaṁ na uppajjissati. Pacchimabhavikānaṁ ye ca arūpaṁ upapajjitvā parinibbāyissanti tesaṁ somanassindriyañca na uppajjissati cakkhundriyañca na uppajjissati.