Yassa vā pana cittaṁ na uppajjissati tassa cittaṁ na uppajjatīti? Pacchimacittassa uppādakkhaṇe tesaṁ cittaṁ na uppajjissati, no ca tesaṁ cittaṁ na uppajjati. Pacchimacittassa bhaṅgakkhaṇe tesaṁ cittaṁ na ceva uppajjissati na ca uppajjati. Yassa cittaṁ uppajjittha tassa cittaṁ uppajjissatīti? Pacchimacittasamaṅgīnaṁ tesaṁ cittaṁ uppajjittha, no ca tesaṁ cittaṁ uppajjissati. Itaresaṁ tesaṁ cittaṁ uppajjittha ceva uppajjissati ca. Yassa vā pana cittaṁ uppajjissati tassa cittaṁ uppajjitthāti? Āmantā. Yassa cittaṁ na uppajjittha tassa cittaṁ na uppajjissatīti? Natthi. Yassa vā pana cittaṁ na uppajjissati tassa cittaṁ na uppajjitthāti? Uppajjittha. 8.2.1.1.5. Nirodhavāra Yassa cittaṁ nirujjhati tassa cittaṁ nirujjhitthāti? Āmantā. Yassa vā pana cittaṁ nirujjhittha tassa cittaṁ nirujjhatīti? Cittassa uppādakkhaṇe nirodhasamāpannānaṁ asaññasattānaṁ tesaṁ cittaṁ nirujjhittha, no ca tesaṁ cittaṁ nirujjhati. Cittassa bhaṅgakkhaṇe tesaṁ cittaṁ nirujjhittha ceva nirujjhati ca. Yassa cittaṁ na nirujjhati tassa cittaṁ na nirujjhitthāti? Nirujjhittha. Yassa vā pana cittaṁ na nirujjhittha tassa cittaṁ na nirujjhatīti? Natthi. Yassa cittaṁ nirujjhati tassa cittaṁ nirujjhissatīti? Pacchimacittassa bhaṅgakkhaṇe tesaṁ cittaṁ nirujjhati, no ca tesaṁ cittaṁ nirujjhissati. Itaresaṁ cittassa bhaṅgakkhaṇe tesaṁ cittaṁ nirujjhati ceva nirujjhissati ca.