Na purisānaṁ upapajjantānaṁ tesaṁ tattha jīvitindriyaṁ uppajjati, no ca tesaṁ tattha purisindriyaṁ uppajjati. Purisānaṁ upapajjantānaṁ tesaṁ tattha jīvitindriyañca uppajjati purisindriyañca uppajjati. Yassa yattha purisindriyaṁ uppajjati tassa tattha somanassindriyaṁ uppajjatīti? Purisānaṁ vinā somanassena upapajjantānaṁ tesaṁ tattha purisindriyaṁ uppajjati, no ca tesaṁ tattha somanassindriyaṁ uppajjati. Purisānaṁ somanassena upapajjantānaṁ tesaṁ tattha purisindriyañca uppajjati somanassindriyañca uppajjati. Yassa vā pana yattha somanassindriyaṁ uppajjati tassa tattha purisindriyaṁ uppajjatīti? Somanassena na purisānaṁ upapajjantānaṁ tesaṁ tattha somanassindriyaṁ uppajjati, no ca tesaṁ tattha purisindriyaṁ uppajjati. Somanassena purisānaṁ upapajjantānaṁ tesaṁ tattha somanassindriyañca uppajjati purisindriyañca uppajjati. Yassa yattha purisindriyaṁ uppajjati tassa tattha upekkhindriyaṁ uppajjatīti? Purisānaṁ vinā upekkhāya upapajjantānaṁ tesaṁ tattha purisindriyaṁ uppajjati, no ca tesaṁ tattha upekkhindriyaṁ uppajjati. Purisānaṁ upekkhāya upapajjantānaṁ tesaṁ tattha purisindriyañca uppajjati upekkhindriyañca uppajjati. Yassa vā pana yattha upekkhindriyaṁ uppajjati tassa tattha purisindriyaṁ uppajjatīti?