Yattha vā pana manindriyaṁ uppajjissati tattha somanassindriyaṁ uppajjissatīti? Āmantā. (Somanassindriyamūlakaṁ.) Yattha upekkhindriyaṁ uppajjissati tattha saddhindriyaṁ …pe… paññindriyaṁ …pe… manindriyaṁ uppajjissatīti? Āmantā. Yattha vā pana manindriyaṁ uppajjissati tattha upekkhindriyaṁ uppajjissatīti? Āmantā. (Upekkhindriyamūlakaṁ.) Yattha saddhindriyaṁ uppajjissati tattha paññindriyaṁ …pe… manindriyaṁ uppajjissatīti? Āmantā. Yattha vā pana manindriyaṁ uppajjissati tattha saddhindriyaṁ uppajjissatīti? Āmantā. (Saddhindriyamūlakaṁ.) Yattha paññindriyaṁ uppajjissati tattha manindriyaṁ uppajjissatīti? Āmantā. Yattha vā pana manindriyaṁ uppajjissati tattha paññindriyaṁ uppajjissatīti? Āmantā. (Paññindriyamūlakaṁ.) 10.2.1.3.3. Anulomapuggalokāsa Yassa yattha cakkhundriyaṁ uppajjissati tassa tattha sotindriyaṁ uppajjissatīti? Āmantā. Yassa vā pana yattha sotindriyaṁ uppajjissati tassa tattha cakkhundriyaṁ uppajjissatīti? Āmantā. Yassa yattha cakkhundriyaṁ uppajjissati tassa tattha ghānindriyaṁ uppajjissatīti? Rūpāvacarānaṁ tesaṁ tattha cakkhundriyaṁ uppajjissati, no ca tesaṁ tattha ghānindriyaṁ uppajjissati. Kāmāvacarānaṁ tesaṁ tattha cakkhundriyañca uppajjissati ghānindriyañca uppajjissati.