Yassa vā pana purisindriyaṁ na uppajjissati tassa ghānindriyaṁ na uppajjatīti? Pacchimabhavikānaṁ kāmāvacaraṁ upapajjantānaṁ ye ca rūpāvacaraṁ arūpāvacaraṁ upapajjitvā parinibbāyissanti yā ca itthiyo eteneva bhāvena katici bhave dassetvā parinibbāyissanti tesaṁ upapajjantānaṁ tesaṁ purisindriyaṁ na uppajjissati, no ca tesaṁ ghānindriyaṁ na uppajjati. Kāmāvacare parinibbantānaṁ rūpāvacare arūpāvacare pacchimabhavikānaṁ ye ca rūpāvacaraṁ arūpāvacaraṁ upapajjitvā parinibbāyissanti yā ca itthiyo eteneva bhāvena katici bhave dassetvā parinibbāyissanti tesaṁ cavantānaṁ tesaṁ purisindriyañca na uppajjissati ghānindriyañca na uppajjati. Yassa ghānindriyaṁ na uppajjati tassa jīvitindriyaṁ na uppajjissatīti? Sabbesaṁ cavantānaṁ aghānakānaṁ upapajjantānaṁ tesaṁ ghānindriyaṁ na uppajjati, no ca tesaṁ jīvitindriyaṁ na uppajjissati. Kāmāvacare parinibbantānaṁ rūpāvacare arūpāvacare pacchimabhavikānaṁ tesaṁ ghānindriyañca na uppajjati jīvitindriyañca na uppajjissati. Yassa vā pana jīvitindriyaṁ na uppajjissati tassa ghānindriyaṁ na uppajjatīti? Pacchimabhavikānaṁ kāmāvacaraṁ upapajjantānaṁ tesaṁ jīvitindriyaṁ na uppajjissati, no ca tesaṁ ghānindriyaṁ na uppajjati. Kāmāvacare parinibbantānaṁ rūpāvacare arūpāvacare pacchimabhavikānaṁ tesaṁ jīvitindriyañca na uppajjissati ghānindriyañca na uppajjati.