Yattha purisindriyaṁ uppajjati tattha jīvitindriyaṁ uppajjatīti? Āmantā. Yattha vā pana jīvitindriyaṁ uppajjati tattha purisindriyaṁ uppajjatīti? Rūpāvacare arūpāvacare tattha jīvitindriyaṁ uppajjati, no ca tattha purisindriyaṁ uppajjati. Kāmāvacare tattha jīvitindriyañca uppajjati purisindriyañca uppajjati. Yattha purisindriyaṁ uppajjati tattha somanassindriyaṁ uppajjatīti? Āmantā. Yattha vā pana somanassindriyaṁ uppajjati tattha purisindriyaṁ uppajjatīti? Rūpāvacare tattha somanassindriyaṁ uppajjati, no ca tattha purisindriyaṁ uppajjati. Kāmāvacare tattha somanassindriyañca uppajjati purisindriyañca uppajjati. Yattha purisindriyaṁ uppajjati tattha upekkhindriyaṁ uppajjatīti? Āmantā. Yattha vā pana upekkhindriyaṁ uppajjati tattha purisindriyaṁ uppajjatīti? Rūpāvacare arūpāvacare tattha upekkhindriyaṁ uppajjati, no ca tattha purisindriyaṁ uppajjati. Kāmāvacare tattha upekkhindriyañca uppajjati purisindriyañca uppajjati. Yattha purisindriyaṁ uppajjati tattha saddhindriyaṁ …pe… paññindriyaṁ …pe… manindriyaṁ uppajjatīti? Āmantā. Yattha vā pana manindriyaṁ uppajjati tattha purisindriyaṁ uppajjatīti? Rūpāvacare arūpāvacare tattha manindriyaṁ uppajjati, no ca tattha purisindriyaṁ uppajjati. Kāmāvacare tattha manindriyañca uppajjati purisindriyañca uppajjati. (Purisindriyamūlakaṁ.)