Yassa vā pana yattha somanassindriyaṁ uppajjati tassa tattha ghānindriyaṁ uppajjatīti? Somanassena aghānakānaṁ upapajjantānaṁ tesaṁ tattha somanassindriyaṁ uppajjati, no ca tesaṁ tattha ghānindriyaṁ uppajjati. Somanassena saghānakānaṁ upapajjantānaṁ tesaṁ tattha somanassindriyañca uppajjati ghānindriyañca uppajjati. Yassa yattha ghānindriyaṁ uppajjati tassa tattha upekkhindriyaṁ uppajjatīti? Saghānakānaṁ vinā upekkhāya upapajjantānaṁ tesaṁ tattha ghānindriyaṁ uppajjati, no ca tesaṁ tattha upekkhindriyaṁ uppajjati. Saghānakānaṁ upekkhāya upapajjantānaṁ tesaṁ tattha ghānindriyañca uppajjati upekkhindriyañca uppajjati. Yassa vā pana yattha upekkhindriyaṁ uppajjati tassa tattha ghānindriyaṁ uppajjatīti? Upekkhāya aghānakānaṁ upapajjantānaṁ tesaṁ tattha upekkhindriyaṁ uppajjati, no ca tesaṁ tattha ghānindriyaṁ uppajjati. Upekkhāya saghānakānaṁ upapajjantānaṁ tesaṁ tattha upekkhindriyañca uppajjati ghānindriyañca uppajjati. Yassa yattha ghānindriyaṁ uppajjati tassa tattha saddhindriyaṁ uppajjatīti? Saghānakānaṁ ahetukānaṁ upapajjantānaṁ tesaṁ tattha ghānindriyaṁ uppajjati, no ca tesaṁ tattha saddhindriyaṁ uppajjati. Saghānakānaṁ sahetukānaṁ upapajjantānaṁ tesaṁ tattha ghānindriyañca uppajjati saddhindriyañca uppajjati.