Sabbesaṁ cittassa bhaṅgakkhaṇe kusalavippayuttacittassa uppādakkhaṇe nirodhasamāpannānaṁ asaññasattānaṁ tesaṁ kusalā dhammā na uppajjanti, no ca tesaṁ abyākatā dhammā na uppajjissanti. Pacchimacittasamaṅgīnaṁ tesaṁ kusalā ca dhammā na uppajjanti abyākatā ca dhammā na uppajjissanti. Yassa vā pana abyākatā dhammā na uppajjissanti tassa kusalā dhammā na uppajjantīti? Āmantā. Yassa akusalā dhammā na uppajjanti tassa abyākatā dhammā na uppajjissantīti? Sabbesaṁ cittassa bhaṅgakkhaṇe akusalavippayuttacittassa uppādakkhaṇe nirodhasamāpannānaṁ asaññasattānaṁ tesaṁ akusalā dhammā na uppajjanti, no ca tesaṁ abyākatā dhammā na uppajjissanti. Pacchimacittasamaṅgīnaṁ tesaṁ akusalā ca dhammā na uppajjanti abyākatā ca dhammā na uppajjissanti. Yassa vā pana abyākatā dhammā na uppajjissanti tassa akusalā dhammā na uppajjantīti? Āmantā. 9.2.1.5.5. Paccanīkaokāsa Yattha kusalā dhammā na uppajjanti tattha akusalā dhammā na uppajjissantīti? …pe…. 9.2.1.5.6. Paccanīkapuggalokāsa Yassa yattha kusalā dhammā na uppajjanti tassa tattha akusalā dhammā na uppajjissantīti? Sabbesaṁ cittassa bhaṅgakkhaṇe kusalavippayuttacittassa uppādakkhaṇe tesaṁ tattha kusalā dhammā na uppajjanti, no ca tesaṁ tattha akusalā dhammā na uppajjissanti. Aggamaggassa bhaṅgakkhaṇe arahantānaṁ yassa cittassa anantarā aggamaggaṁ paṭilabhissanti tassa cittassa bhaṅgakkhaṇe asaññasattānaṁ tesaṁ tattha kusalā ca dhammā na uppajjanti akusalā ca dhammā na uppajjissanti.