Sabbesaṁ cavantānaṁ pavatte cittassa bhaṅgakkhaṇe tesaṁ kusalā dhammā na uppajjanti, no ca tesaṁ abyākatā dhammā na nirujjhanti. Sabbesaṁ upapajjantānaṁ pavatte kusalavippayuttacittassa uppādakkhaṇe arūpe kusalākusalānaṁ bhaṅgakkhaṇe tesaṁ kusalā ca dhammā na uppajjanti abyākatā ca dhammā na nirujjhanti. Yassa vā pana abyākatā dhammā na nirujjhanti tassa kusalā dhammā na uppajjantīti? Kusalānaṁ uppādakkhaṇe tesaṁ abyākatā dhammā na nirujjhanti, no ca tesaṁ kusalā dhammā na uppajjanti. Sabbesaṁ upapajjantānaṁ pavatte kusalavippayuttacittassa uppādakkhaṇe arūpe kusalākusalānaṁ bhaṅgakkhaṇe tesaṁ abyākatā ca dhammā na nirujjhanti kusalā ca dhammā na uppajjanti. Yassa akusalā dhammā na uppajjanti tassa abyākatā dhammā na nirujjhantīti? Sabbesaṁ cavantānaṁ pavatte cittassa bhaṅgakkhaṇe tesaṁ akusalā dhammā na uppajjanti, no ca tesaṁ abyākatā dhammā na nirujjhanti. Sabbesaṁ upapajjantānaṁ pavatte akusalavippayuttacittassa uppādakkhaṇe arūpe kusalākusalānaṁ bhaṅgakkhaṇe tesaṁ akusalā ca dhammā na uppajjanti abyākatā ca dhammā na nirujjhanti. Yassa vā pana abyākatā dhammā na nirujjhanti tassa akusalā dhammā na uppajjantīti? Akusalānaṁ uppādakkhaṇe tesaṁ abyākatā dhammā na nirujjhanti, no ca tesaṁ akusalā dhammā na uppajjanti. Sabbesaṁ upapajjantānaṁ pavatte akusalavippayuttacittassa uppādakkhaṇe arūpe kusalākusalānaṁ bhaṅgakkhaṇe tesaṁ abyākatā ca dhammā na nirujjhanti akusalā ca dhammā na uppajjanti. 9.2.3.1.5. Paccanīkaokāsa