Yassa ghānindriyaṁ uppajjati tassa saddhindriyaṁ uppajjatīti? Saghānakānaṁ ahetukānaṁ upapajjantānaṁ tesaṁ ghānindriyaṁ uppajjati, no ca tesaṁ saddhindriyaṁ uppajjati. Saghānakānaṁ sahetukānaṁ upapajjantānaṁ tesaṁ ghānindriyañca uppajjati saddhindriyañca uppajjati. Yassa vā pana saddhindriyaṁ uppajjati tassa ghānindriyaṁ uppajjatīti? Sahetukānaṁ aghānakānaṁ upapajjantānaṁ tesaṁ saddhindriyaṁ uppajjati, no ca tesaṁ ghānindriyaṁ uppajjati. Sahetukānaṁ saghānakānaṁ upapajjantānaṁ tesaṁ saddhindriyañca uppajjati ghānindriyañca uppajjati. Yassa ghānindriyaṁ uppajjati tassa paññindriyaṁ uppajjatīti? Saghānakānaṁ ñāṇavippayuttānaṁ upapajjantānaṁ tesaṁ ghānindriyaṁ uppajjati, no ca tesaṁ paññindriyaṁ uppajjati. Saghānakānaṁ ñāṇasampayuttānaṁ upapajjantānaṁ tesaṁ ghānindriyañca uppajjati paññindriyañca uppajjati. Yassa vā pana paññindriyaṁ uppajjati tassa ghānindriyaṁ uppajjatīti? Ñāṇasampayuttānaṁ aghānakānaṁ upapajjantānaṁ tesaṁ paññindriyaṁ uppajjati, no ca tesaṁ ghānindriyaṁ uppajjati. Ñāṇasampayuttānaṁ saghānakānaṁ upapajjantānaṁ tesaṁ paññindriyañca uppajjati ghānindriyañca uppajjati. Yassa ghānindriyaṁ uppajjati tassa manindriyaṁ uppajjatīti? Āmantā.