Yo domanassindriyaṁ nappajahati so aññātāvindriyaṁ na sacchikarotīti? Yo aggaphalaṁ sacchikaroti so domanassindriyaṁ nappajahati, no ca aññātāvindriyaṁ na sacchikaroti. Anāgāmimaggasamaṅgiñca arahantañca ṭhapetvā avasesā puggalā domanassindriyañca nappajahanti aññātāvindriyañca na sacchikaronti. Yo vā pana aññātāvindriyaṁ na sacchikaroti so domanassindriyaṁ nappajahatīti? Anāgāmimaggasamaṅgī aññātāvindriyaṁ na sacchikaroti, no ca domanassindriyaṁ nappajahati. Anāgāmimaggasamaṅgiñca arahantañca ṭhapetvā avasesā puggalā aññātāvindriyañca na sacchikaronti domanassindriyañca nappajahanti. (Domanassindriyamūlakaṁ.) Yo anaññātaññassāmītindriyaṁ na bhāveti so aññindriyaṁ na bhāvetīti? Tayo maggasamaṅgino anaññātaññassāmītindriyaṁ na bhāventi, no ca aññindriyaṁ na bhāventi. Cattāro maggasamaṅgino ṭhapetvā avasesā puggalā anaññātaññassāmītindriyañca na bhāventi aññindriyañca na bhāventi. Yo vā pana aññindriyaṁ na bhāveti so anaññātaññassāmītindriyaṁ na bhāvetīti? Aṭṭhamako aññindriyaṁ na bhāveti, no ca anaññātaññassāmītindriyaṁ na bhāveti. Cattāro maggasamaṅgino ṭhapetvā avasesā puggalā aññindriyañca na bhāventi anaññātaññassāmītindriyañca na bhāventi.