Yassa yattha somanassindriyaṁ na uppajjittha tassa tattha upekkhindriyaṁ na uppajjissatīti? Suddhāvāsānaṁ dutiye citte vattamāne tesaṁ tattha somanassindriyaṁ na uppajjittha, no ca tesaṁ tattha upekkhindriyaṁ na uppajjissati. Asaññasattānaṁ tesaṁ tattha somanassindriyañca na uppajjittha upekkhindriyañca na uppajjissati. Yassa vā pana yattha upekkhindriyaṁ na uppajjissati tassa tattha somanassindriyaṁ na uppajjitthāti? Pacchimacittasamaṅgīnaṁ yassa cittassa anantarā somanassasampayuttapacchimacittaṁ uppajjissati tesaṁ tattha upekkhindriyaṁ na uppajjissati, no ca tesaṁ tattha somanassindriyaṁ na uppajjittha. Asaññasattānaṁ tesaṁ tattha upekkhindriyañca na uppajjissati somanassindriyañca na uppajjittha. Yassa yattha somanassindriyaṁ na uppajjittha tassa tattha saddhindriyaṁ …pe… paññindriyaṁ …pe… manindriyaṁ na uppajjissatīti? Suddhāvāsānaṁ dutiye citte vattamāne tesaṁ tattha somanassindriyaṁ na uppajjittha, no ca tesaṁ tattha manindriyaṁ na uppajjissati. Asaññasattānaṁ tesaṁ tattha somanassindriyañca na uppajjittha manindriyañca na uppajjissati. Yassa vā pana yattha manindriyaṁ na uppajjissati tassa tattha somanassindriyaṁ na uppajjitthāti? Pacchimacittasamaṅgīnaṁ tesaṁ tattha manindriyaṁ na uppajjissati, no ca tesaṁ tattha somanassindriyaṁ na uppajjittha. Asaññasattānaṁ tesaṁ tattha manindriyañca na uppajjissati somanassindriyañca na uppajjittha. (Somanassindriyamūlakaṁ.)