Yassa yattha jīvitindriyaṁ na uppajjati tassa tattha saddhindriyaṁ …pe… paññindriyaṁ …pe… manindriyaṁ na uppajjissatīti? Catuvokārā pañcavokārā cavantānaṁ pavatte cittassa bhaṅgakkhaṇe tesaṁ tattha jīvitindriyaṁ na uppajjati, no ca tesaṁ tattha manindriyaṁ na uppajjissati. Pacchimacittassa bhaṅgakkhaṇe asaññasattā cavantānaṁ tesaṁ tattha jīvitindriyañca na uppajjati manindriyañca na uppajjissati. Yassa vā pana yattha manindriyaṁ na uppajjissati tassa tattha jīvitindriyaṁ na uppajjatīti? Pacchimacittassa uppādakkhaṇe asaññasattaṁ upapajjantānaṁ tesaṁ tattha manindriyaṁ na uppajjissati, no ca tesaṁ tattha jīvitindriyaṁ na uppajjati. Pacchimacittassa bhaṅgakkhaṇe asaññasattā cavantānaṁ tesaṁ tattha manindriyañca na uppajjissati jīvitindriyañca na uppajjati. (Jīvitindriyamūlakaṁ.) Yassa yattha somanassindriyaṁ na uppajjati tassa tattha upekkhindriyaṁ na uppajjissatīti? Sabbesaṁ cittassa bhaṅgakkhaṇe somanassavippayuttacittassa uppādakkhaṇe tesaṁ tattha somanassindriyaṁ na uppajjati, no ca tesaṁ tattha upekkhindriyaṁ na uppajjissati. Somanassasampayuttapacchimacittassa bhaṅgakkhaṇe upekkhāsampayuttapacchimacittasamaṅgīnaṁ yassa cittassa anantarā somanassasampayuttapacchimacittaṁ uppajjissati tassa cittassa bhaṅgakkhaṇe asaññasattānaṁ tesaṁ tattha somanassindriyañca na uppajjati upekkhindriyañca na uppajjissati.