Aghānakānaṁ sacittakānaṁ upapajjantānaṁ tesaṁ tattha ghānindriyaṁ na uppajjati, no ca tesaṁ tattha manindriyaṁ na uppajjati. Sabbesaṁ cavantānaṁ acittakānaṁ upapajjantānaṁ tesaṁ tattha ghānindriyañca na uppajjati manindriyañca na uppajjati. Yassa vā pana yattha manindriyaṁ na uppajjati tassa tattha ghānindriyaṁ na uppajjatīti? Āmantā. (Ghānindriyamūlakaṁ.) Yassa yattha itthindriyaṁ na uppajjati tassa tattha purisindriyaṁ na uppajjatīti? Purisānaṁ upapajjantānaṁ tesaṁ tattha itthindriyaṁ na uppajjati, no ca tesaṁ tattha purisindriyaṁ na uppajjati. Sabbesaṁ cavantānaṁ na itthīnaṁ na purisānaṁ upapajjantānaṁ tesaṁ tattha itthindriyañca na uppajjati purisindriyañca na uppajjati. Yassa vā pana yattha purisindriyaṁ na uppajjati tassa tattha itthindriyaṁ na uppajjatīti? Itthīnaṁ upapajjantīnaṁ tāsaṁ tattha purisindriyaṁ na uppajjati, no ca tāsaṁ tattha itthindriyaṁ na uppajjati. Sabbesaṁ cavantānaṁ na purisānaṁ na itthīnaṁ upapajjantānaṁ tesaṁ tattha purisindriyañca na uppajjati itthindriyañca na uppajjati. Yassa yattha itthindriyaṁ na uppajjati tassa tattha jīvitindriyaṁ na uppajjatīti? Na itthīnaṁ upapajjantānaṁ tesaṁ tattha itthindriyaṁ na uppajjati, no ca tesaṁ tattha jīvitindriyaṁ na uppajjati. Sabbesaṁ cavantānaṁ tesaṁ tattha itthindriyañca na uppajjati jīvitindriyañca na uppajjati.