Yassa vā pana yattha abyākatā dhammā na nirujjhittha tassa tattha kusalā dhammā na nirujjhantīti? Āmantā. Yassa yattha akusalā dhammā na nirujjhanti tassa tattha abyākatā dhammā na nirujjhitthāti? Sabbesaṁ cittassa uppādakkhaṇe akusalavippayuttacittassa bhaṅgakkhaṇe asaññasattānaṁ tesaṁ tattha akusalā dhammā na nirujjhanti, no ca tesaṁ tattha abyākatā dhammā na nirujjhittha. Suddhāvāsaṁ upapajjantānaṁ tesaṁ tattha akusalā ca dhammā na nirujjhanti abyākatā ca dhammā na nirujjhittha. Yassa vā pana yattha abyākatā dhammā na nirujjhittha tassa tattha akusalā dhammā na nirujjhantīti? Āmantā. 9.2.2.5. Paccuppannānāgatavāra 9.2.2.5.1. Anulomapuggala Yassa kusalā dhammā nirujjhanti tassa akusalā dhammā nirujjhissantīti? Aggamaggassa bhaṅgakkhaṇe yassa cittassa anantarā aggamaggaṁ paṭilabhissanti tassa cittassa bhaṅgakkhaṇe tesaṁ kusalā dhammā nirujjhanti, no ca tesaṁ akusalā dhammā nirujjhissanti. Itaresaṁ kusalānaṁ bhaṅgakkhaṇe tesaṁ kusalā ca dhammā nirujjhanti akusalā ca dhammā nirujjhissanti. Yassa vā pana akusalā dhammā nirujjhissanti tassa kusalā dhammā nirujjhantīti?