Yassa vā pana cittaṁ na uppannaṁ tassa cittaṁ na nirujjhamānanti? Āmantā. 8.2.1.1.10. Uppannuppādavāra Yassa cittaṁ uppannaṁ tassa cittaṁ uppajjitthāti? Āmantā. Yassa vā pana cittaṁ uppajjittha tassa cittaṁ uppannanti? Nirodhasamāpannānaṁ asaññasattānaṁ tesaṁ cittaṁ uppajjittha, no ca tesaṁ cittaṁ uppannaṁ. Cittasamaṅgīnaṁ tesaṁ cittaṁ uppajjittha ceva uppannañca. Yassa cittaṁ na uppannaṁ tassa cittaṁ na uppajjitthāti? Uppajjittha. Yassa vā pana cittaṁ na uppajjittha tassa cittaṁ na uppannanti? Natthi. Yassa cittaṁ uppannaṁ tassa cittaṁ uppajjissatīti? Pacchimacittasamaṅgīnaṁ tesaṁ cittaṁ uppannaṁ, no ca tesaṁ cittaṁ uppajjissati. Itaresaṁ cittasamaṅgīnaṁ tesaṁ cittaṁ uppannañceva uppajjissati ca. Yassa vā pana cittaṁ uppajjissati tassa cittaṁ uppannanti? Nirodhasamāpannānaṁ asaññasattānaṁ tesaṁ cittaṁ uppajjissati, no ca tesaṁ cittaṁ uppannaṁ. Cittasamaṅgīnaṁ tesaṁ cittaṁ uppajjissati ceva uppannañca. Yassa cittaṁ na uppannaṁ tassa cittaṁ na uppajjissatīti? Uppajjissati. Yassa vā pana cittaṁ na uppajjissati tassa cittaṁ na uppannanti? Uppannaṁ. 8.2.1.1.11. Atītānāgatavāra Yassa cittaṁ uppajjittha no ca tassa cittaṁ uppannaṁ, tassa cittaṁ uppajjissatīti? Āmantā. Yassa vā pana cittaṁ uppajjissati no ca tassa cittaṁ uppannaṁ, tassa cittaṁ uppajjitthāti? Āmantā.