Kāmāvacarā cavantānaṁ na purisānaṁ kāmāvacaraṁ upapajjantānaṁ rūpāvacarānaṁ arūpāvacarānaṁ tesaṁ tattha manindriyaṁ uppajjittha, no ca tesaṁ tattha purisindriyaṁ uppajjati. Purisānaṁ upapajjantānaṁ tesaṁ tattha manindriyañca uppajjittha purisindriyañca uppajjati. (Purisindriyamūlakaṁ.) Yassa yattha jīvitindriyaṁ uppajjati tassa tattha somanassindriyaṁ uppajjitthāti? Suddhāvāsānaṁ upapatticittassa uppādakkhaṇe asaññasattaṁ upapajjantānaṁ tesaṁ tattha jīvitindriyaṁ uppajjati, no ca tesaṁ tattha somanassindriyaṁ uppajjittha. Itaresaṁ catuvokāraṁ pañcavokāraṁ upapajjantānaṁ pavatte cittassa uppādakkhaṇe tesaṁ tattha jīvitindriyañca uppajjati somanassindriyañca uppajjittha. Yassa vā pana yattha somanassindriyaṁ uppajjittha tassa tattha jīvitindriyaṁ uppajjatīti? Catuvokārā pañcavokārā cavantānaṁ pavatte cittassa bhaṅgakkhaṇe tesaṁ tattha somanassindriyaṁ uppajjittha, no ca tesaṁ tattha jīvitindriyaṁ uppajjati. Catuvokāraṁ pañcavokāraṁ upapajjantānaṁ pavatte cittassa uppādakkhaṇe tesaṁ tattha somanassindriyañca uppajjittha jīvitindriyañca uppajjati. Yassa yattha jīvitindriyaṁ uppajjati tassa tattha upekkhindriyaṁ uppajjitthāti? Suddhāvāsaṁ upapajjantānaṁ asaññasattaṁ upapajjantānaṁ tesaṁ tattha jīvitindriyaṁ uppajjati, no ca tesaṁ tattha upekkhindriyaṁ uppajjittha. Itaresaṁ catuvokāraṁ pañcavokāraṁ upapajjantānaṁ pavatte cittassa uppādakkhaṇe tesaṁ tattha jīvitindriyañca uppajjati upekkhindriyañca uppajjittha.