Pavatte somanassasampayuttasaddhāvippayuttacittassa uppādakkhaṇe tesaṁ somanassindriyaṁ uppajjati, no ca tesaṁ saddhindriyaṁ uppajjati. Somanassena upapajjantānaṁ pavatte somanassasampayuttasaddhāsampayuttacittassa uppādakkhaṇe tesaṁ somanassindriyañca uppajjati saddhindriyañca uppajjati. Yassa vā pana saddhindriyaṁ uppajjati tassa somanassindriyaṁ uppajjatīti? Sahetukānaṁ vinā somanassena upapajjantānaṁ pavatte saddhāsampayuttasomanassavippayuttacittassa uppādakkhaṇe tesaṁ saddhindriyaṁ uppajjati, no ca tesaṁ somanassindriyaṁ uppajjati. Somanassena upapajjantānaṁ pavatte saddhāsampayuttasomanassasampayuttacittassa uppādakkhaṇe tesaṁ saddhindriyañca uppajjati somanassindriyañca uppajjati. Yassa somanassindriyaṁ uppajjati tassa paññindriyaṁ uppajjatīti? Somanassena ñāṇavippayuttānaṁ upapajjantānaṁ pavatte somanassasampayuttañāṇavippayuttacittassa uppādakkhaṇe tesaṁ somanassindriyaṁ uppajjati, no ca tesaṁ paññindriyaṁ uppajjati. Somanassena ñāṇasampayuttānaṁ upapajjantānaṁ pavatte somanassasampayuttañāṇasampayuttacittassa uppādakkhaṇe tesaṁ somanassindriyañca uppajjati paññindriyañca uppajjati. Yassa vā pana paññindriyaṁ uppajjati tassa somanassindriyaṁ uppajjatīti? Ñāṇasampayuttānaṁ vinā somanassena upapajjantānaṁ pavatte ñāṇasampayuttasomanassavippayuttacittassa uppādakkhaṇe tesaṁ paññindriyaṁ uppajjati, no ca tesaṁ somanassindriyaṁ uppajjati. Ñāṇasampayuttānaṁ somanassena upapajjantānaṁ pavatte ñāṇasampayuttasomanassasampayuttacittassa uppādakkhaṇe tesaṁ paññindriyañca uppajjati somanassindriyañca uppajjati.