Yassa purisindriyaṁ uppajjissati tassa saddhindriyaṁ …pe… paññindriyaṁ …pe… manindriyaṁ uppajjissatīti? Āmantā. Yassa vā pana manindriyaṁ uppajjissati tassa purisindriyaṁ uppajjissatīti? Ye rūpāvacaraṁ arūpāvacaraṁ upapajjitvā parinibbāyissanti yā ca itthiyo eteneva bhāvena katici bhave dassetvā parinibbāyissanti tesaṁ manindriyaṁ uppajjissati, no ca tesaṁ purisindriyaṁ uppajjissati. Itaresaṁ tesaṁ manindriyañca uppajjissati purisindriyañca uppajjissati. (Purisindriyamūlakaṁ.) Yassa jīvitindriyaṁ uppajjissati tassa somanassindriyaṁ uppajjissatīti? Yassa cittassa anantarā upekkhāsampayuttapacchimacittaṁ uppajjissati tesaṁ jīvitindriyaṁ uppajjissati, no ca tesaṁ somanassindriyaṁ uppajjissati. Itaresaṁ tesaṁ jīvitindriyañca uppajjissati somanassindriyañca uppajjissati. Yassa vā pana somanassindriyaṁ uppajjissati tassa jīvitindriyaṁ uppajjissatīti? Āmantā. Yassa jīvitindriyaṁ uppajjissati tassa upekkhindriyaṁ uppajjissatīti? Yassa cittassa anantarā somanassasampayuttapacchimacittaṁ uppajjissati tesaṁ jīvitindriyaṁ uppajjissati, no ca tesaṁ upekkhindriyaṁ uppajjissati. Itaresaṁ tesaṁ jīvitindriyañca uppajjissati upekkhindriyañca uppajjissati. Yassa vā pana upekkhindriyaṁ uppajjissati tassa jīvitindriyaṁ uppajjissatīti? Āmantā.