Yo domanassindriyaṁ pajahati so aññindriyaṁ bhāvetīti? Āmantā. Yo vā pana aññindriyaṁ bhāveti so domanassindriyaṁ pajahatīti? Dve puggalā aññindriyaṁ bhāventi, no ca domanassindriyaṁ pajahanti. Anāgāmimaggasamaṅgī aññindriyañca bhāveti domanassindriyañca pajahati. Yo domanassindriyaṁ pajahati so aññātāvindriyaṁ sacchikarotīti? No. Yo vā pana aññātāvindriyaṁ sacchikaroti so domanassindriyaṁ pajahatīti? No. (Domanassindriyamūlakaṁ.) Yo anaññātaññassāmītindriyaṁ bhāveti so aññindriyaṁ bhāvetīti? No. Yo vā pana aññindriyaṁ bhāveti so anaññātaññassāmītindriyaṁ bhāvetīti? No. Yo anaññātaññassāmītindriyaṁ bhāveti so aññātāvindriyaṁ sacchikarotīti? No. Yo vā pana aññātāvindriyaṁ sacchikaroti so anaññātaññassāmītindriyaṁ bhāvetīti? No. (Anaññātaññassāmītindriyamūlakaṁ.) Yo aññindriyaṁ bhāveti so aññātāvindriyaṁ sacchikarotīti? No. Yo vā pana aññātāvindriyaṁ sacchikaroti so aññindriyaṁ bhāvetīti? No. (Aññindriyamūlakaṁ.) 10.3.1.2. Paccanīka Yo cakkhundriyaṁ na parijānāti so domanassindriyaṁ nappajahatīti? Anāgāmimaggasamaṅgī cakkhundriyaṁ na parijānāti, no ca domanassindriyaṁ nappajahati. Dve maggasamaṅgino ṭhapetvā avasesā puggalā cakkhundriyañca na parijānanti domanassindriyañca nappajahanti.