Yassa itthindriyaṁ uppajjati tassa saddhindriyaṁ …pe… paññindriyaṁ …pe… manindriyaṁ uppajjissatīti? Pacchimabhavikānaṁ itthīnaṁ upapajjantīnaṁ tāsaṁ itthindriyaṁ uppajjati, no ca tāsaṁ manindriyaṁ uppajjissati. Itarāsaṁ itthīnaṁ upapajjantīnaṁ tāsaṁ itthindriyañca uppajjati manindriyañca uppajjissati. Yassa vā pana manindriyaṁ uppajjissati tassa itthindriyaṁ uppajjatīti? Sabbesaṁ cavantānaṁ na itthīnaṁ upapajjantānaṁ tesaṁ manindriyaṁ uppajjissati, no ca tesaṁ itthindriyaṁ uppajjati. Itthīnaṁ upapajjantīnaṁ tāsaṁ manindriyañca uppajjissati itthindriyañca uppajjati. (Itthindriyamūlakaṁ.) Yassa purisindriyaṁ uppajjati tassa jīvitindriyaṁ uppajjissatīti? Pacchimabhavikānaṁ purisānaṁ upapajjantānaṁ tesaṁ purisindriyaṁ uppajjati, no ca tesaṁ jīvitindriyaṁ uppajjissati. Itaresaṁ purisānaṁ upapajjantānaṁ tesaṁ purisindriyañca uppajjati jīvitindriyañca uppajjissati. Yassa vā pana jīvitindriyaṁ uppajjissati tassa purisindriyaṁ uppajjatīti? Sabbesaṁ cavantānaṁ na purisānaṁ upapajjantānaṁ tesaṁ jīvitindriyaṁ uppajjissati, no ca tesaṁ purisindriyaṁ uppajjati. Purisānaṁ upapajjantānaṁ tesaṁ jīvitindriyañca uppajjissati purisindriyañca uppajjati.