Ye rūpāvacaraṁ arūpāvacaraṁ upapajjitvā parinibbāyissanti ye ca purisā eteneva bhāvena katici bhave dassetvā upekkhāya upapajjitvā parinibbāyissanti tesaṁ upekkhindriyaṁ uppajjissati, no ca tesaṁ itthindriyaṁ uppajjissati. Itaresaṁ tesaṁ upekkhindriyañca uppajjissati itthindriyañca uppajjissati. Yassa itthindriyaṁ uppajjissati tassa saddhindriyaṁ …pe… paññindriyaṁ …pe… manindriyaṁ uppajjissatīti? Āmantā. Yassa vā pana manindriyaṁ uppajjissati tassa itthindriyaṁ uppajjissatīti? Ye rūpāvacaraṁ arūpāvacaraṁ upapajjitvā parinibbāyissanti ye ca purisā eteneva bhāvena katici bhave dassetvā parinibbāyissanti tesaṁ manindriyaṁ uppajjissati, no ca tesaṁ itthindriyaṁ uppajjissati. Itaresaṁ tesaṁ manindriyañca uppajjissati itthindriyañca uppajjissati. (Itthindriyamūlakaṁ.) Yassa purisindriyaṁ uppajjissati tassa jīvitindriyaṁ uppajjissatīti? Āmantā. Yassa vā pana jīvitindriyaṁ uppajjissati tassa purisindriyaṁ uppajjissatīti? Ye rūpāvacaraṁ arūpāvacaraṁ upapajjitvā parinibbāyissanti yā ca itthiyo eteneva bhāvena katici bhave dassetvā parinibbāyissanti tesaṁ jīvitindriyaṁ uppajjissati, no ca tesaṁ purisindriyaṁ uppajjissati. Itaresaṁ tesaṁ jīvitindriyañca uppajjissati purisindriyañca uppajjissati. Yassa purisindriyaṁ uppajjissati tassa somanassindriyaṁ uppajjissatīti?