Sabbesaṁ cavantānaṁ pavatte akusalavippayuttacittassa bhaṅgakkhaṇe tesaṁ akusalā dhammā na nirujjhanti, no ca tesaṁ abyākatā dhammā na nirujjhanti. Sabbesaṁ upapajjantānaṁ pavatte cittassa uppādakkhaṇe arūpe kusalānaṁ bhaṅgakkhaṇe tesaṁ akusalā ca dhammā na nirujjhanti abyākatā ca dhammā na nirujjhanti. Yassa vā pana abyākatā dhammā na nirujjhanti tassa akusalā dhammā na nirujjhantīti? Arūpe akusalānaṁ bhaṅgakkhaṇe tesaṁ abyākatā dhammā na nirujjhanti, no ca tesaṁ akusalā dhammā na nirujjhanti. Sabbesaṁ upapajjantānaṁ pavatte cittassa uppādakkhaṇe arūpe kusalānaṁ bhaṅgakkhaṇe tesaṁ abyākatā ca dhammā na nirujjhanti akusalā ca dhammā na nirujjhanti. 9.2.2.1.5. Paccanīkaokāsa Yattha kusalā dhammā na nirujjhanti tattha akusalā dhammā na nirujjhantīti? Āmantā. Yattha vā pana akusalā dhammā na nirujjhanti tattha kusalā dhammā na nirujjhantīti? Āmantā. Yattha kusalā dhammā na nirujjhanti tattha abyākatā dhammā na nirujjhantīti? Nirujjhanti. Yattha vā pana abyākatā dhammā na nirujjhanti tattha kusalā dhammā na nirujjhantīti? Natthi. Yattha akusalā dhammā na nirujjhanti tattha abyākatā dhammā na nirujjhantīti? Nirujjhanti. Yattha vā pana abyākatā dhammā na nirujjhanti tattha akusalā dhammā na nirujjhantīti? Natthi. 9.2.2.1.6. Paccanīkapuggalokāsa Yassa yattha kusalā dhammā na nirujjhanti tassa tattha akusalā dhammā na nirujjhantīti?