Yassa purisindriyaṁ uppajjittha tassa saddhindriyaṁ …pe… paññindriyaṁ …pe… manindriyaṁ uppajjissatīti? Pacchimabhavikānaṁ tesaṁ purisindriyaṁ uppajjittha, no ca tesaṁ manindriyaṁ uppajjissati. Itaresaṁ tesaṁ purisindriyañca uppajjittha manindriyañca uppajjissati. Yassa vā pana manindriyaṁ uppajjissati tassa purisindriyaṁ uppajjitthāti? Āmantā. (Purisindriyamūlakaṁ.) Yassa jīvitindriyaṁ uppajjittha tassa somanassindriyaṁ uppajjissatīti? Pacchimacittasamaṅgīnaṁ yassa cittassa anantarā upekkhāsampayuttapacchimacittaṁ uppajjissati tesaṁ jīvitindriyaṁ uppajjittha, no ca tesaṁ somanassindriyaṁ uppajjissati. Itaresaṁ tesaṁ jīvitindriyañca uppajjittha somanassindriyañca uppajjissati. Yassa vā pana somanassindriyaṁ uppajjissati tassa jīvitindriyaṁ uppajjitthāti? Āmantā. Yassa jīvitindriyaṁ uppajjittha tassa upekkhindriyaṁ uppajjissatīti? Pacchimacittasamaṅgīnaṁ yassa cittassa anantarā somanassasampayuttapacchimacittaṁ uppajjissati tesaṁ jīvitindriyaṁ uppajjittha, no ca tesaṁ upekkhindriyaṁ uppajjissati. Itaresaṁ tesaṁ jīvitindriyañca uppajjittha upekkhindriyañca uppajjissati. Yassa vā pana upekkhindriyaṁ uppajjissati tassa jīvitindriyaṁ uppajjitthāti? Āmantā.