Pañcavokāre pacchimabhavikānaṁ tesaṁ tattha manindriyaṁ na uppajjissati, no ca tesaṁ tattha cakkhundriyaṁ na uppajjittha. Suddhāvāsānaṁ arūpe pacchimabhavikānaṁ asaññasattānaṁ tesaṁ tattha manindriyañca na uppajjissati cakkhundriyañca na uppajjittha. (Cakkhundriyamūlakaṁ.) Yassa yattha ghānindriyaṁ na uppajjittha tassa tattha itthindriyaṁ na uppajjissatīti? Āmantā. Yassa vā pana yattha itthindriyaṁ na uppajjissati tassa tattha ghānindriyaṁ na uppajjitthāti? Kāmāvacare pacchimabhavikānaṁ ye ca purisā eteneva bhāvena katici bhave dassetvā parinibbāyissanti tesaṁ tattha itthindriyaṁ na uppajjissati, no ca tesaṁ tattha ghānindriyaṁ na uppajjittha. Rūpāvacarānaṁ arūpāvacarānaṁ tesaṁ tattha itthindriyañca na uppajjissati ghānindriyañca na uppajjittha. Yassa yattha ghānindriyaṁ na uppajjittha tassa tattha purisindriyaṁ na uppajjissatīti? Āmantā. Yassa vā pana yattha purisindriyaṁ na uppajjissati tassa tattha ghānindriyaṁ na uppajjitthāti? Kāmāvacare pacchimabhavikānaṁ yā ca itthiyo eteneva bhāvena katici bhave dassetvā parinibbāyissanti tesaṁ tattha purisindriyaṁ na uppajjissati, no ca tesaṁ tattha ghānindriyaṁ na uppajjittha. Rūpāvacarānaṁ arūpāvacarānaṁ tesaṁ tattha purisindriyañca na uppajjissati ghānindriyañca na uppajjittha. Yassa yattha ghānindriyaṁ na uppajjittha tassa tattha jīvitindriyaṁ na uppajjissatīti?