Yassa jīvitindriyaṁ uppajjittha tassa saddhindriyaṁ …pe… paññindriyaṁ …pe… manindriyaṁ uppajjissatīti? Pacchimacittasamaṅgīnaṁ tesaṁ jīvitindriyaṁ uppajjittha, no ca tesaṁ manindriyaṁ uppajjissati. Itaresaṁ tesaṁ jīvitindriyañca uppajjittha manindriyañca uppajjissati. Yassa vā pana manindriyaṁ uppajjissati tassa jīvitindriyaṁ uppajjitthāti? Āmantā. (Jīvitindriyamūlakaṁ.) Yassa somanassindriyaṁ uppajjittha tassa upekkhindriyaṁ uppajjissatīti? Pacchimacittasamaṅgīnaṁ yassa cittassa anantarā somanassasampayuttapacchimacittaṁ uppajjissati tesaṁ somanassindriyaṁ uppajjittha, no ca tesaṁ upekkhindriyaṁ uppajjissati. Itaresaṁ tesaṁ somanassindriyañca uppajjittha upekkhindriyañca uppajjissati. Yassa vā pana upekkhindriyaṁ uppajjissati tassa somanassindriyaṁ uppajjitthāti? Āmantā. Yassa somanassindriyaṁ uppajjittha tassa saddhindriyaṁ …pe… paññindriyaṁ …pe… manindriyaṁ uppajjissatīti? Pacchimacittasamaṅgīnaṁ tesaṁ somanassindriyaṁ uppajjittha, no ca tesaṁ manindriyaṁ uppajjissati. Itaresaṁ tesaṁ somanassindriyañca uppajjittha manindriyañca uppajjissati.