Pacchimabhavikānaṁ ye ca rūpāvacaraṁ arūpāvacaraṁ upapajjitvā parinibbāyissanti ye ca purisā eteneva bhāvena katici bhave dassetvā parinibbāyissanti tesaṁ cakkhundriyaṁ uppajjittha, no ca tesaṁ itthindriyaṁ uppajjissati. Itaresaṁ tesaṁ cakkhundriyañca uppajjittha itthindriyañca uppajjissati. Yassa vā pana itthindriyaṁ uppajjissati tassa cakkhundriyaṁ uppajjitthāti? Āmantā. Yassa cakkhundriyaṁ uppajjittha tassa purisindriyaṁ uppajjissatīti? Pacchimabhavikānaṁ ye ca rūpāvacaraṁ arūpāvacaraṁ upapajjitvā parinibbāyissanti yā ca itthiyo eteneva bhāvena katici bhave dassetvā parinibbāyissanti tesaṁ cakkhundriyaṁ uppajjittha, no ca tesaṁ purisindriyaṁ uppajjissati. Itaresaṁ tesaṁ cakkhundriyañca uppajjittha purisindriyañca uppajjissati. Yassa vā pana purisindriyaṁ uppajjissati tassa cakkhundriyaṁ uppajjitthāti? Āmantā. Yassa cakkhundriyaṁ uppajjittha tassa jīvitindriyaṁ uppajjissatīti? Pacchimabhavikānaṁ tesaṁ cakkhundriyaṁ uppajjittha, no ca tesaṁ jīvitindriyaṁ uppajjissati. Itaresaṁ tesaṁ cakkhundriyañca uppajjittha jīvitindriyañca uppajjissati. Yassa vā pana jīvitindriyaṁ uppajjissati tassa cakkhundriyaṁ uppajjitthāti? Āmantā. Yassa cakkhundriyaṁ uppajjittha tassa somanassindriyaṁ uppajjissatīti? Pacchimabhavikānaṁ ye ca upekkhāya upapajjitvā parinibbāyissanti tesaṁ cakkhundriyaṁ uppajjittha, no ca tesaṁ somanassindriyaṁ uppajjissati. Itaresaṁ tesaṁ cakkhundriyañca uppajjittha somanassindriyañca uppajjissati. Yassa vā pana somanassindriyaṁ uppajjissati tassa cakkhundriyaṁ uppajjitthāti? Āmantā.