Yattha vā pana purisindriyaṁ uppajjissati tattha itthindriyaṁ uppajjissatīti? Āmantā …pe…. Yattha purisindriyaṁ uppajjissati tattha jīvitindriyaṁ uppajjissatīti? Āmantā. Yattha vā pana jīvitindriyaṁ uppajjissati tattha purisindriyaṁ uppajjissatīti? Rūpāvacare arūpāvacare tattha jīvitindriyaṁ uppajjissati, no ca tattha purisindriyaṁ uppajjissati. Kāmāvacare tattha jīvitindriyañca uppajjissati purisindriyañca uppajjissati. Yattha purisindriyaṁ uppajjissati tattha somanassindriyaṁ uppajjissatīti? Āmantā. Yattha vā pana somanassindriyaṁ uppajjissati tattha purisindriyaṁ uppajjissatīti? Rūpāvacare tattha somanassindriyaṁ uppajjissati, no ca tattha purisindriyaṁ uppajjissati. Kāmāvacare tattha somanassindriyañca uppajjissati purisindriyañca uppajjissati. Yattha purisindriyaṁ uppajjissati tattha upekkhindriyaṁ uppajjissatīti? Āmantā. Yattha vā pana upekkhindriyaṁ uppajjissati tattha purisindriyaṁ uppajjissatīti? Rūpāvacare arūpāvacare tattha upekkhindriyaṁ uppajjissati, no ca tattha purisindriyaṁ uppajjissati. Kāmāvacare tattha upekkhindriyañca uppajjissati purisindriyañca uppajjissati.