Yassa yattha saddhindriyaṁ na uppajjati tassa tattha manindriyaṁ na uppajjatīti? Ahetukānaṁ sacittakānaṁ upapajjantānaṁ pavatte saddhāvippayuttacittassa uppādakkhaṇe tesaṁ tattha saddhindriyaṁ na uppajjati, no ca tesaṁ tattha manindriyaṁ na uppajjati. Sabbesaṁ cittassa bhaṅgakkhaṇe asaññasattānaṁ tesaṁ tattha saddhindriyañca na uppajjati manindriyañca na uppajjati. Yassa vā pana yattha manindriyaṁ na uppajjati tassa tattha saddhindriyaṁ na uppajjatīti? Āmantā. (Saddhindriyamūlakaṁ.) Yassa yattha paññindriyaṁ na uppajjati tassa tattha manindriyaṁ na uppajjatīti? Ñāṇavippayuttānaṁ sacittakānaṁ upapajjantānaṁ pavatte ñāṇavippayuttacittassa uppādakkhaṇe tesaṁ tattha paññindriyaṁ na uppajjati, no ca tesaṁ tattha manindriyaṁ na uppajjati. Sabbesaṁ cittassa bhaṅgakkhaṇe asaññasattānaṁ tesaṁ tattha paññindriyañca na uppajjati manindriyañca na uppajjati. Yassa vā pana yattha manindriyaṁ na uppajjati tassa tattha paññindriyaṁ na uppajjatīti? Āmantā. (Paññindriyamūlakaṁ.) 10.2.1.2. Atītavāra 10.2.1.2.1. Anulomapuggala Yassa cakkhundriyaṁ uppajjittha tassa sotindriyaṁ uppajjitthāti? Āmantā. Yassa vā pana sotindriyaṁ uppajjittha tassa cakkhundriyaṁ uppajjitthāti? Āmantā.