Kāmāvacarā cavantānaṁ na itthīnaṁ kāmāvacaraṁ upapajjantānaṁ rūpāvacarānaṁ arūpāvacarānaṁ tesaṁ tattha jīvitindriyaṁ uppajjissati, no ca tesaṁ tattha itthindriyaṁ uppajjati. Itthīnaṁ upapajjantīnaṁ tāsaṁ tattha jīvitindriyañca uppajjissati itthindriyañca uppajjati. Yassa yattha itthindriyaṁ uppajjati tassa tattha somanassindriyaṁ uppajjissatīti? Pacchimabhavikānaṁ itthīnaṁ upapajjantīnaṁ yā ca itthiyo upekkhāya upapajjitvā parinibbāyissanti tāsaṁ upapajjantīnaṁ tāsaṁ tattha itthindriyaṁ uppajjati, no ca tāsaṁ tattha somanassindriyaṁ uppajjissati. Itarāsaṁ itthīnaṁ upapajjantīnaṁ tāsaṁ tattha itthindriyañca uppajjati somanassindriyañca uppajjissati. Yassa vā pana yattha somanassindriyaṁ uppajjissati tassa tattha itthindriyaṁ uppajjatīti? Kāmāvacarā cavantānaṁ na itthīnaṁ kāmāvacaraṁ upapajjantānaṁ rūpāvacarānaṁ tesaṁ tattha somanassindriyaṁ uppajjissati, no ca tesaṁ tattha itthindriyaṁ uppajjati. Itthīnaṁ upapajjantīnaṁ tāsaṁ tattha somanassindriyañca uppajjissati itthindriyañca uppajjati. Yassa yattha itthindriyaṁ uppajjati tassa tattha upekkhindriyaṁ uppajjissatīti? Pacchimabhavikānaṁ itthīnaṁ upapajjantīnaṁ yā ca itthiyo somanassena upapajjitvā parinibbāyissanti tāsaṁ upapajjantīnaṁ tāsaṁ tattha itthindriyaṁ uppajjati, no ca tāsaṁ tattha upekkhindriyaṁ uppajjissati. Itarāsaṁ itthīnaṁ upapajjantīnaṁ tāsaṁ tattha itthindriyañca uppajjati upekkhindriyañca uppajjissati.