Ñāṇavippayuttānaṁ somanassena upapajjantānaṁ pavatte ñāṇavippayuttasomanassasampayuttacittassa uppādakkhaṇe tesaṁ paññindriyaṁ na uppajjati, no ca tesaṁ somanassindriyaṁ na uppajjati. Sabbesaṁ cittassa bhaṅgakkhaṇe ñāṇavippayuttasomanassavippayuttacittassa uppādakkhaṇe nirodhasamāpannānaṁ asaññasattānaṁ tesaṁ paññindriyañca na uppajjati somanassindriyañca na uppajjati. Yassa somanassindriyaṁ na uppajjati tassa manindriyaṁ na uppajjatīti? Vinā somanassena sacittakānaṁ upapajjantānaṁ pavatte somanassavippayuttacittassa uppādakkhaṇe tesaṁ somanassindriyaṁ na uppajjati, no ca tesaṁ manindriyaṁ na uppajjati. Sabbesaṁ cittassa bhaṅgakkhaṇe nirodhasamāpannānaṁ asaññasattānaṁ tesaṁ somanassindriyañca na uppajjati manindriyañca na uppajjati. Yassa vā pana manindriyaṁ na uppajjati tassa somanassindriyaṁ na uppajjatīti? Āmantā. (Somanassindriyamūlakaṁ.) Yassa upekkhindriyaṁ na uppajjati tassa saddhindriyaṁ na uppajjatīti? Vinā upekkhāya sahetukānaṁ upapajjantānaṁ pavatte upekkhāvippayuttasaddhāsampayuttacittassa uppādakkhaṇe tesaṁ upekkhindriyaṁ na uppajjati, no ca tesaṁ saddhindriyaṁ na uppajjati. Sabbesaṁ cittassa bhaṅgakkhaṇe upekkhāvippayuttasaddhāvippayuttacittassa uppādakkhaṇe nirodhasamāpannānaṁ asaññasattānaṁ tesaṁ upekkhindriyañca na uppajjati saddhindriyañca na uppajjati.