Yassa yattha somanassindriyaṁ na uppajjissati tassa tattha saddhindriyaṁ …pe… paññindriyaṁ …pe… manindriyaṁ na uppajjissatīti? Yassa cittassa anantarā upekkhāsampayuttapacchimacittaṁ uppajjissati tesaṁ tattha somanassindriyaṁ na uppajjissati, no ca tesaṁ tattha manindriyaṁ na uppajjissati. Pacchimacittasamaṅgīnaṁ asaññasattānaṁ tesaṁ tattha somanassindriyañca na uppajjissati manindriyañca na uppajjissati. Yassa vā pana yattha manindriyaṁ na uppajjissati tassa tattha somanassindriyaṁ na uppajjissatīti? Āmantā. (Somanassindriyamūlakaṁ.) Yassa yattha upekkhindriyaṁ na uppajjissati tassa tattha saddhindriyaṁ …pe… paññindriyaṁ …pe… manindriyaṁ na uppajjissatīti?