Yo anaññātaññassāmītindriyaṁ na bhāveti so aññātāvindriyaṁ na sacchikarotīti? Yo aggaphalaṁ sacchikaroti so anaññātaññassāmītindriyaṁ na bhāveti, no ca aññātāvindriyaṁ na sacchikaroti. Aṭṭhamakañca arahantañca ṭhapetvā avasesā puggalā anaññātaññassāmītindriyañca na bhāventi aññātāvindriyañca na sacchikaronti. Yo vā pana aññātāvindriyaṁ na sacchikaroti so anaññātaññassāmītindriyaṁ na bhāvetīti? Aṭṭhamako aññātāvindriyaṁ na sacchikaroti, no ca anaññātaññassāmītindriyaṁ na bhāveti. Aṭṭhamakañca arahantañca ṭhapetvā avasesā puggalā aññātāvindriyañca na sacchikaronti anaññātaññassāmītindriyañca na bhāventi. (Anaññātaññassāmītindriyamūlakaṁ.) Yo aññindriyaṁ na bhāveti so aññātāvindriyaṁ na sacchikarotīti? Yo aggaphalaṁ sacchikaroti so aññindriyaṁ na bhāveti, no ca aññātāvindriyaṁ na sacchikaroti. Tayo maggasamaṅgino ca arahantañca ṭhapetvā avasesā puggalā aññindriyañca na bhāventi aññātāvindriyañca na sacchikaronti. Yo vā pana aññātāvindriyaṁ na sacchikaroti so aññindriyaṁ na bhāvetīti? Tayo maggasamaṅgino aññātāvindriyaṁ na sacchikaronti, no ca aññindriyaṁ na bhāventi. Tayo maggasamaṅgino ca arahantañca ṭhapetvā avasesā puggalā aññātāvindriyañca na sacchikaronti aññindriyañca na bhāventi. (Aññindriyamūlakaṁ.) 10.3 Pariññāvāra 10.3.2. Atītavāra 10.3.2.1. Anuloma