Yassa upekkhindriyaṁ na uppajjati tassa manindriyaṁ na uppajjatīti? Vinā upekkhāya sacittakānaṁ upapajjantānaṁ pavatte upekkhāvippayuttacittassa uppādakkhaṇe tesaṁ upekkhindriyaṁ na uppajjati, no ca tesaṁ manindriyaṁ na uppajjati. Sabbesaṁ cittassa bhaṅgakkhaṇe nirodhasamāpannānaṁ asaññasattānaṁ tesaṁ upekkhindriyañca na uppajjati manindriyañca na uppajjati. Yassa vā pana manindriyaṁ na uppajjati tassa upekkhindriyaṁ na uppajjatīti? Āmantā. (Upekkhindriyamūlakaṁ.) Yassa saddhindriyaṁ na uppajjati tassa paññindriyaṁ na uppajjatīti? Āmantā. Yassa vā pana paññindriyaṁ na uppajjati tassa saddhindriyaṁ na uppajjatīti? Ñāṇavippayuttānaṁ sahetukānaṁ upapajjantānaṁ pavatte ñāṇavippayuttasaddhāsampayuttacittassa uppādakkhaṇe tesaṁ paññindriyaṁ na uppajjati, no ca tesaṁ saddhindriyaṁ na uppajjati. Sabbesaṁ cittassa bhaṅgakkhaṇe ñāṇavippayuttasaddhāvippayuttacittassa uppādakkhaṇe nirodhasamāpannānaṁ asaññasattānaṁ tesaṁ paññindriyañca na uppajjati saddhindriyañca na uppajjati. Yassa saddhindriyaṁ na uppajjati tassa manindriyaṁ na uppajjatīti?