Yaṁ vā pana cittaṁ nirujjhamānaṁ khaṇaṁ khaṇaṁ vītikkantaṁ atikkantakālaṁ, uppajjamānaṁ khaṇaṁ khaṇaṁ vītikkantaṁ atikkantakālaṁ taṁ cittanti? Atītaṁ cittaṁ. Yaṁ cittaṁ na uppajjamānaṁ khaṇaṁ khaṇaṁ vītikkantaṁ atikkantakālaṁ, na nirujjhamānaṁ khaṇaṁ khaṇaṁ vītikkantaṁ atikkantakālaṁ taṁ cittanti? Uppādakkhaṇe anāgataṁ cittaṁ. Yaṁ vā pana cittaṁ na nirujjhamānaṁ khaṇaṁ khaṇaṁ vītikkantaṁ atikkantakālaṁ, na uppajjamānaṁ khaṇaṁ khaṇaṁ vītikkantaṁ atikkantakālaṁ taṁ cittanti? Bhaṅgakkhaṇe cittaṁ bhaṅgakkhaṇaṁ avītikkantaṁ no ca uppādakkhaṇaṁ avītikkantaṁ, uppādakkhaṇe anāgatañca cittaṁ bhaṅgakkhaṇañca avītikkantaṁ uppādakkhaṇañca avītikkantaṁ. 8.2.1.3. Puggaladhammavāra 8.2.1.3.1. Uppādanirodhakālasambhedavāra Yassa yaṁ cittaṁ uppajjati na nirujjhati tassa taṁ cittaṁ nirujjhissati na uppajjissatīti? Āmantā. Yassa vā pana yaṁ cittaṁ nirujjhissati na uppajjissati tassa taṁ cittaṁ uppajjati na nirujjhatīti? Āmantā. Yassa yaṁ cittaṁ na uppajjati nirujjhati tassa taṁ cittaṁ na nirujjhissati uppajjissatīti? No. Yassa vā pana yaṁ cittaṁ na nirujjhissati uppajjissati tassa taṁ cittaṁ na uppajjati nirujjhatīti? Natthi. 8.2.1.3.2. Uppāduppannavāra Yassa yaṁ cittaṁ uppajjati tassa taṁ cittaṁ uppannanti? Āmantā. Yassa vā pana yaṁ cittaṁ uppannaṁ tassa taṁ cittaṁ uppajjatīti? Bhaṅgakkhaṇe cittaṁ uppannaṁ, no ca tassa taṁ cittaṁ uppajjati. Uppādakkhaṇe cittaṁ uppannañceva uppajjati ca.