Pacchimacittasamaṅgīnaṁ yassa cittassa anantarā upekkhāsampayuttapacchimacittaṁ uppajjissati asaññasattānaṁ tesaṁ tattha jīvitindriyaṁ uppajjittha, no ca tesaṁ tattha somanassindriyaṁ uppajjissati. Itaresaṁ catuvokārānaṁ pañcavokārānaṁ tesaṁ tattha jīvitindriyañca uppajjittha somanassindriyañca uppajjissati. Yassa vā pana yattha somanassindriyaṁ uppajjissati tassa tattha jīvitindriyaṁ uppajjitthāti? Suddhāvāsaṁ upapajjantānaṁ tesaṁ tattha somanassindriyaṁ uppajjissati, no ca tesaṁ tattha jīvitindriyaṁ uppajjittha. Itaresaṁ catuvokārānaṁ pañcavokārānaṁ tesaṁ tattha somanassindriyañca uppajjissati jīvitindriyañca uppajjittha. Yassa yattha jīvitindriyaṁ uppajjittha tassa tattha upekkhindriyaṁ uppajjissatīti? Pacchimacittasamaṅgīnaṁ yassa cittassa anantarā somanassasampayuttapacchimacittaṁ uppajjissati asaññasattānaṁ tesaṁ tattha jīvitindriyaṁ uppajjittha, no ca tesaṁ tattha upekkhindriyaṁ uppajjissati. Itaresaṁ catuvokārānaṁ pañcavokārānaṁ tesaṁ tattha jīvitindriyañca uppajjittha upekkhindriyañca uppajjissati. Yassa vā pana yattha upekkhindriyaṁ uppajjissati tassa tattha jīvitindriyaṁ uppajjitthāti? Suddhāvāsaṁ upapajjantānaṁ tesaṁ tattha upekkhindriyaṁ uppajjissati, no ca tesaṁ tattha jīvitindriyaṁ uppajjittha. Itaresaṁ catuvokārānaṁ pañcavokārānaṁ tesaṁ tattha upekkhindriyañca uppajjissati jīvitindriyañca uppajjittha.