Yassa yattha cakkhundriyaṁ uppajjittha tassa tattha saddhindriyaṁ …pe… paññindriyaṁ …pe… manindriyaṁ uppajjissatīti? Pañcavokāre pacchimabhavikānaṁ tesaṁ tattha cakkhundriyaṁ uppajjittha, no ca tesaṁ tattha manindriyaṁ uppajjissati. Itaresaṁ pañcavokārānaṁ tesaṁ tattha cakkhundriyañca uppajjittha manindriyañca uppajjissati. Yassa vā pana yattha manindriyaṁ uppajjissati tassa tattha cakkhundriyaṁ uppajjitthāti? Arūpānaṁ tesaṁ tattha manindriyaṁ uppajjissati, no ca tesaṁ tattha cakkhundriyaṁ uppajjittha. Pañcavokārānaṁ tesaṁ tattha manindriyañca uppajjissati cakkhundriyañca uppajjittha. (Cakkhundriyamūlakaṁ.) Yassa yattha ghānindriyaṁ uppajjittha tassa tattha itthindriyaṁ uppajjissatīti? Kāmāvacare pacchimabhavikānaṁ ye ca purisā eteneva bhāvena katici bhave dassetvā parinibbāyissanti tesaṁ tattha ghānindriyaṁ uppajjittha, no ca tesaṁ tattha itthindriyaṁ uppajjissati. Itaresaṁ kāmāvacarānaṁ tesaṁ tattha ghānindriyañca uppajjittha itthindriyañca uppajjissati. Yassa vā pana yattha itthindriyaṁ uppajjissati tassa tattha ghānindriyaṁ uppajjitthāti? Āmantā.