Kāmāvacare pacchimabhavikānaṁ ye ca saghānakā upekkhāya upapajjitvā parinibbāyissanti tesaṁ tattha ghānindriyaṁ uppajjittha, no ca tesaṁ tattha somanassindriyaṁ uppajjissati. Itaresaṁ kāmāvacarānaṁ tesaṁ tattha ghānindriyañca uppajjittha somanassindriyañca uppajjissati. Yassa vā pana yattha somanassindriyaṁ uppajjissati tassa tattha ghānindriyaṁ uppajjitthāti? Rūpāvacarānaṁ tesaṁ tattha somanassindriyaṁ uppajjissati, no ca tesaṁ tattha ghānindriyaṁ uppajjittha. Kāmāvacarānaṁ tesaṁ tattha somanassindriyañca uppajjissati ghānindriyañca uppajjittha. Yassa yattha ghānindriyaṁ uppajjittha tassa tattha upekkhindriyaṁ uppajjissatīti? Kāmāvacare pacchimabhavikānaṁ ye ca saghānakā somanassena upapajjitvā parinibbāyissanti tesaṁ tattha ghānindriyaṁ uppajjittha, no ca tesaṁ tattha upekkhindriyaṁ uppajjissati. Itaresaṁ kāmāvacarānaṁ tesaṁ tattha ghānindriyañca uppajjittha upekkhindriyañca uppajjissati. Yassa vā pana yattha upekkhindriyaṁ uppajjissati tassa tattha ghānindriyaṁ uppajjitthāti? Rūpāvacarānaṁ arūpāvacarānaṁ tesaṁ tattha upekkhindriyaṁ uppajjissati, no ca tesaṁ tattha ghānindriyaṁ uppajjittha. Kāmāvacarānaṁ tesaṁ tattha upekkhindriyañca uppajjissati ghānindriyañca uppajjittha.
