Vinā somanassena upapajjantānaṁ pavatte somanassavippayuttacittassa uppādakkhaṇe tesaṁ jīvitindriyaṁ uppajjati, no ca tesaṁ somanassindriyaṁ uppajjati. Somanassena upapajjantānaṁ pavatte somanassasampayuttacittassa uppādakkhaṇe tesaṁ jīvitindriyañca uppajjati somanassindriyañca uppajjati. Yassa vā pana somanassindriyaṁ uppajjati tassa jīvitindriyaṁ uppajjatīti? Āmantā. Yassa jīvitindriyaṁ uppajjati tassa upekkhindriyaṁ uppajjatīti? Vinā upekkhāya upapajjantānaṁ pavatte upekkhāvippayuttacittassa uppādakkhaṇe tesaṁ jīvitindriyaṁ uppajjati, no ca tesaṁ upekkhindriyaṁ uppajjati. Upekkhāya upapajjantānaṁ pavatte upekkhāsampayuttacittassa uppādakkhaṇe tesaṁ jīvitindriyañca uppajjati upekkhindriyañca uppajjati. Yassa vā pana upekkhindriyaṁ uppajjati tassa jīvitindriyaṁ uppajjatīti? Āmantā. Yassa jīvitindriyaṁ uppajjati tassa saddhindriyaṁ uppajjatīti? Ahetukānaṁ upapajjantānaṁ pavatte saddhāvippayuttacittassa uppādakkhaṇe tesaṁ jīvitindriyaṁ uppajjati, no ca tesaṁ saddhindriyaṁ uppajjati. Sahetukānaṁ upapajjantānaṁ pavatte saddhāsampayuttacittassa uppādakkhaṇe tesaṁ jīvitindriyañca uppajjati saddhindriyañca uppajjati. Yassa vā pana saddhindriyaṁ uppajjati tassa jīvitindriyaṁ uppajjatīti? Āmantā. Yassa jīvitindriyaṁ uppajjati tassa paññindriyaṁ uppajjatīti?