Yassa vā pana abyākatā dhammā nirujjhissanti tassa kusalā dhammā uppajjissantīti? Aggamaggasamaṅgīnaṁ arahantānaṁ tesaṁ abyākatā dhammā nirujjhissanti, no ca tesaṁ kusalā dhammā uppajjissanti. Itaresaṁ tesaṁ abyākatā ca dhammā nirujjhissanti kusalā ca dhammā uppajjissanti. Yassa akusalā dhammā uppajjissanti tassa abyākatā dhammā nirujjhissantīti? Āmantā. Yassa vā pana abyākatā dhammā nirujjhissanti tassa akusalā dhammā uppajjissantīti? Aggamaggasamaṅgīnaṁ arahantānaṁ yassa cittassa anantarā aggamaggaṁ paṭilabhissanti tesaṁ abyākatā dhammā nirujjhissanti, no ca tesaṁ akusalā dhammā uppajjissanti. Itaresaṁ tesaṁ abyākatā ca dhammā nirujjhissanti akusalā ca dhammā uppajjissanti. 9.2.3.3.2. Anulomaokāsa Yattha kusalā dhammā uppajjissanti tattha akusalā dhammā nirujjhissantīti? Āmantā. Yattha vā pana akusalā dhammā nirujjhissanti tattha kusalā dhammā uppajjissantīti? Āmantā. Yattha kusalā dhammā uppajjissanti tattha abyākatā dhammā nirujjhissantīti? Āmantā. Yattha vā pana abyākatā dhammā nirujjhissanti tattha kusalā dhammā uppajjissantīti? Asaññasatte tattha abyākatā dhammā nirujjhissanti, no ca tattha kusalā dhammā uppajjissanti. Catuvokāre pañcavokāre tattha abyākatā ca dhammā nirujjhissanti kusalā ca dhammā uppajjissanti.
