Yassa vā pana yattha abyākatā dhammā na nirujjhissanti tassa tattha kusalā dhammā na uppajjitthāti? Uppajjittha. Yassa yattha akusalā dhammā na uppajjittha tassa tattha abyākatā dhammā na nirujjhissantīti? Nirujjhissanti. Yassa vā pana yattha abyākatā dhammā na nirujjhissanti tassa tattha akusalā dhammā na uppajjitthāti? Uppajjittha. Uppādanirodhavāro. Pavattivāro niṭṭhito. 9.3. Bhāvanāvāra Yo kusalaṁ dhammaṁ bhāveti so akusalaṁ dhammaṁ pajahatīti? Āmantā. Yo vā pana akusalaṁ dhammaṁ pajahati so kusalaṁ dhammaṁ bhāvetīti? Āmantā. Yo kusalaṁ dhammaṁ na bhāveti so akusalaṁ dhammaṁ nappajahatīti? Āmantā. Yo vā pana akusalaṁ dhammaṁ nappajahati so kusalaṁ dhammaṁ na bhāvetīti? Āmantā …pe…. Bhāvanāvāro. Dhammayamakapāḷi niṭṭhitā.