Sacakkhukānaṁ ahetukānaṁ upapajjantānaṁ tesaṁ cakkhundriyaṁ uppajjati, no ca tesaṁ saddhindriyaṁ uppajjati. Sacakkhukānaṁ sahetukānaṁ upapajjantānaṁ tesaṁ cakkhundriyañca uppajjati saddhindriyañca uppajjati. Yassa vā pana saddhindriyaṁ uppajjati tassa cakkhundriyaṁ uppajjatīti? Sahetukānaṁ acakkhukānaṁ upapajjantānaṁ tesaṁ saddhindriyaṁ uppajjati, no ca tesaṁ cakkhundriyaṁ uppajjati. Sahetukānaṁ sacakkhukānaṁ upapajjantānaṁ tesaṁ saddhindriyañca uppajjati cakkhundriyañca uppajjati. Yassa cakkhundriyaṁ uppajjati tassa paññindriyaṁ uppajjatīti? Sacakkhukānaṁ ñāṇavippayuttānaṁ upapajjantānaṁ tesaṁ cakkhundriyaṁ uppajjati, no ca tesaṁ paññindriyaṁ uppajjati. Sacakkhukānaṁ ñāṇasampayuttānaṁ upapajjantānaṁ tesaṁ cakkhundriyañca uppajjati paññindriyañca uppajjati. Yassa vā pana paññindriyaṁ uppajjati tassa cakkhundriyaṁ uppajjatīti? Ñāṇasampayuttānaṁ acakkhukānaṁ upapajjantānaṁ tesaṁ paññindriyaṁ uppajjati, no ca tesaṁ cakkhundriyaṁ uppajjati. Ñāṇasampayuttānaṁ sacakkhukānaṁ upapajjantānaṁ tesaṁ paññindriyañca uppajjati cakkhundriyañca uppajjati. Yassa cakkhundriyaṁ uppajjati tassa manindriyaṁ uppajjatīti? Āmantā. Yassa vā pana manindriyaṁ uppajjati tassa cakkhundriyaṁ uppajjatīti? Sacittakānaṁ acakkhukānaṁ upapajjantānaṁ tesaṁ manindriyaṁ uppajjati, no ca tesaṁ cakkhundriyaṁ uppajjati. Sacakkhukānaṁ upapajjantānaṁ tesaṁ manindriyañca uppajjati cakkhundriyañca uppajjati. (Cakkhundriyamūlakaṁ.)