Rūpāvacare tattha somanassindriyaṁ uppajjissati, no ca tattha ghānindriyaṁ uppajjissati. Kāmāvacare tattha somanassindriyañca uppajjissati ghānindriyañca uppajjissati. Yattha ghānindriyaṁ uppajjissati tattha upekkhindriyaṁ uppajjissatīti? Āmantā. Yattha vā pana upekkhindriyaṁ uppajjissati tattha ghānindriyaṁ uppajjissatīti? Rūpāvacare arūpāvacare tattha upekkhindriyaṁ uppajjissati, no ca tattha ghānindriyaṁ uppajjissati. Kāmāvacare tattha upekkhindriyañca uppajjissati ghānindriyañca uppajjissati. Yattha ghānindriyaṁ uppajjissati tattha saddhindriyaṁ …pe… paññindriyaṁ …pe… manindriyaṁ uppajjissatīti? Āmantā. Yattha vā pana manindriyaṁ uppajjissati tattha ghānindriyaṁ uppajjissatīti? Rūpāvacare arūpāvacare tattha manindriyaṁ uppajjissati, no ca tattha ghānindriyaṁ uppajjissati. Kāmāvacare tattha manindriyañca uppajjissati ghānindriyañca uppajjissati. (Ghānindriyamūlakaṁ.) Yattha itthindriyaṁ uppajjissati tattha purisindriyaṁ uppajjissatīti? Āmantā.