Yassa vā pana manindriyaṁ na uppajjissati tassa itthindriyaṁ na uppajjissatīti? Āmantā. (Itthindriyamūlakaṁ.) Yassa purisindriyaṁ na uppajjissati tassa jīvitindriyaṁ na uppajjissatīti? Ye rūpāvacaraṁ arūpāvacaraṁ upapajjitvā parinibbāyissanti yā ca itthiyo eteneva bhāvena katici bhave dassetvā parinibbāyissanti tesaṁ purisindriyaṁ na uppajjissati, no ca tesaṁ jīvitindriyaṁ na uppajjissati. Pacchimabhavikānaṁ tesaṁ purisindriyañca na uppajjissati jīvitindriyañca na uppajjissati. Yassa vā pana jīvitindriyaṁ na uppajjissati tassa purisindriyaṁ na uppajjissatīti? Āmantā. Yassa purisindriyaṁ na uppajjissati tassa somanassindriyaṁ na uppajjissatīti? Ye rūpāvacaraṁ upapajjitvā parinibbāyissanti yā ca itthiyo eteneva bhāvena katici bhave dassetvā somanassena upapajjitvā parinibbāyissanti tesaṁ purisindriyaṁ na uppajjissati, no ca tesaṁ somanassindriyaṁ na uppajjissati. Pacchimabhavikānaṁ ye ca arūpaṁ upapajjitvā parinibbāyissanti yā ca itthiyo eteneva bhāvena katici bhave dassetvā upekkhāya upapajjitvā parinibbāyissanti tesaṁ purisindriyañca na uppajjissati somanassindriyañca na uppajjissati. Yassa vā pana somanassindriyaṁ na uppajjissati tassa purisindriyaṁ na uppajjissatīti?