Sabbesaṁ cavantānaṁ pavatte cittassa bhaṅgakkhaṇe tesaṁ upekkhindriyaṁ uppajjissati, no ca tesaṁ jīvitindriyaṁ uppajjati. Sabbesaṁ upapajjantānaṁ pavatte cittassa uppādakkhaṇe tesaṁ upekkhindriyañca uppajjissati jīvitindriyañca uppajjati. Yassa jīvitindriyaṁ uppajjati tassa saddhindriyaṁ …pe… paññindriyaṁ …pe… manindriyaṁ uppajjissatīti? Pacchimacittassa uppādakkhaṇe tesaṁ jīvitindriyaṁ uppajjati, no ca tesaṁ manindriyaṁ uppajjissati. Itaresaṁ upapajjantānaṁ pavatte cittassa uppādakkhaṇe tesaṁ jīvitindriyañca uppajjati manindriyañca uppajjissati. Yassa vā pana manindriyaṁ uppajjissati tassa jīvitindriyaṁ uppajjatīti? Sabbesaṁ cavantānaṁ pavatte cittassa bhaṅgakkhaṇe tesaṁ manindriyaṁ uppajjissati, no ca tesaṁ jīvitindriyaṁ uppajjati. Sabbesaṁ upapajjantānaṁ pavatte cittassa uppādakkhaṇe tesaṁ manindriyañca uppajjissati jīvitindriyañca uppajjati. (Jīvitindriyamūlakaṁ.) Yassa somanassindriyaṁ uppajjati tassa upekkhindriyaṁ uppajjissatīti? Somanassasampayuttapacchimacittassa uppādakkhaṇe yassa cittassa anantarā somanassasampayuttapacchimacittaṁ uppajjissati tassa cittassa uppādakkhaṇe tesaṁ somanassindriyaṁ uppajjati, no ca tesaṁ upekkhindriyaṁ uppajjissati. Itaresaṁ somanassena upapajjantānaṁ pavatte somanassasampayuttacittassa uppādakkhaṇe tesaṁ somanassindriyañca uppajjati upekkhindriyañca uppajjissati. Yassa vā pana upekkhindriyaṁ uppajjissati tassa somanassindriyaṁ uppajjatīti?