Yassa yattha itthindriyaṁ uppajjati tassa tattha purisindriyaṁ uppajjissatīti? Pacchimabhavikānaṁ itthīnaṁ upapajjantīnaṁ yā ca itthiyo eteneva bhāvena katici bhave dassetvā parinibbāyissanti tāsaṁ upapajjantīnaṁ tāsaṁ tattha itthindriyaṁ uppajjati, no ca tāsaṁ tattha purisindriyaṁ uppajjissati. Itarāsaṁ itthīnaṁ upapajjantīnaṁ tāsaṁ tattha itthindriyañca uppajjati purisindriyañca uppajjissati. Yassa vā pana yattha purisindriyaṁ uppajjissati tassa tattha itthindriyaṁ uppajjatīti? Kāmāvacarā cavantānaṁ na itthīnaṁ kāmāvacaraṁ upapajjantānaṁ tesaṁ tattha purisindriyaṁ uppajjissati, no ca tesaṁ tattha itthindriyaṁ uppajjati. Itthīnaṁ upapajjantīnaṁ tāsaṁ tattha purisindriyañca uppajjissati itthindriyañca uppajjati. Yassa yattha itthindriyaṁ uppajjati tassa tattha jīvitindriyaṁ uppajjissatīti? Pacchimabhavikānaṁ itthīnaṁ upapajjantīnaṁ tāsaṁ tattha itthindriyaṁ uppajjati, no ca tāsaṁ tattha jīvitindriyaṁ uppajjissati. Itarāsaṁ itthīnaṁ upapajjantīnaṁ tāsaṁ tattha itthindriyañca uppajjati jīvitindriyañca uppajjissati. Yassa vā pana yattha jīvitindriyaṁ uppajjissati tassa tattha itthindriyaṁ uppajjatīti?