Yassa saddhindriyaṁ na uppajjati tassa paññindriyaṁ …pe… manindriyaṁ na uppajjissatīti? Sabbesaṁ cittassa bhaṅgakkhaṇe saddhāvippayuttacittassa uppādakkhaṇe nirodhasamāpannānaṁ asaññasattānaṁ tesaṁ saddhindriyaṁ na uppajjati, no ca tesaṁ manindriyaṁ na uppajjissati. Pacchimacittassa bhaṅgakkhaṇe tesaṁ saddhindriyañca na uppajjati manindriyañca na uppajjissati. Yassa vā pana manindriyaṁ na uppajjissati tassa saddhindriyaṁ na uppajjatīti? Pacchimacittassa uppādakkhaṇe tesaṁ manindriyaṁ na uppajjissati, no ca tesaṁ saddhindriyaṁ na uppajjati. Pacchimacittassa bhaṅgakkhaṇe tesaṁ manindriyañca na uppajjissati saddhindriyañca na uppajjati. (Saddhindriyamūlakaṁ.) Yassa paññindriyaṁ na uppajjati tassa manindriyaṁ na uppajjissatīti?