Pañcavokāre pacchimabhavikānaṁ tesaṁ tattha cakkhundriyaṁ uppajjittha, no ca tesaṁ tattha sotindriyaṁ uppajjissati. Itaresaṁ pañcavokārānaṁ tesaṁ tattha cakkhundriyañca uppajjittha sotindriyañca uppajjissati. Yassa vā pana yattha sotindriyaṁ uppajjissati tassa tattha cakkhundriyaṁ uppajjitthāti? Āmantā. Yassa yattha cakkhundriyaṁ uppajjittha tassa tattha ghānindriyaṁ uppajjissatīti? Kāmāvacare pacchimabhavikānaṁ rūpāvacarānaṁ tesaṁ tattha cakkhundriyaṁ uppajjittha, no ca tesaṁ tattha ghānindriyaṁ uppajjissati. Itaresaṁ kāmāvacarānaṁ tesaṁ tattha cakkhundriyañca uppajjittha ghānindriyañca uppajjissati. Yassa vā pana yattha ghānindriyaṁ uppajjissati tassa tattha cakkhundriyaṁ uppajjitthāti? Āmantā. Yassa yattha cakkhundriyaṁ uppajjittha tassa tattha itthindriyaṁ uppajjissatīti? Kāmāvacare pacchimabhavikānaṁ rūpāvacarānaṁ ye ca purisā eteneva bhāvena katici bhave dassetvā parinibbāyissanti tesaṁ tattha cakkhundriyaṁ uppajjittha, no ca tesaṁ tattha itthindriyaṁ uppajjissati. Itaresaṁ kāmāvacarānaṁ tesaṁ tattha cakkhundriyañca uppajjittha itthindriyañca uppajjissati. Yassa vā pana yattha itthindriyaṁ uppajjissati tassa tattha cakkhundriyaṁ uppajjitthāti? Āmantā.